தமிழர் சமய வரலாறு

சமய பொருளை விளக்க எழுந்த இலக்கியங்கள் உருவத்தாலும் உள்ளடக்கத்தாலும் மொழியாலும் பலவாக விரிவாகின்றன. எவ்வெச்சமயப் பொருளை எவ்வெவ் இலக்கியம் எவ்வெவ் காலத்தில் எவ்வெவ்வாறு கூறியுள்ளது என்ற நோக்கிலே பல ஆராய்ச்சி நூல்கள் எழுந்துள்ளன. இந்நூலிலே கூறப்படும் கருத்துக்கள் பொது வகையிலே ‘சமய இலக்கியமும் காலமாறுதலும்’ என்ற தலைப்புக்குப் பொருந்துபவை. ஆனால் சிறப்பு வகையிலே சமயம் என்பது இந்து சமயத்தைக் குறிக்கவும் இலக்கியம் என்பது தமிழ் இலக்கியத்தைக் குறிக்கவும் காலமாறுதல் என்பது குறிப்பிட்ட காலப் பகுதிகளுக்கிடையே ஏற்பட்ட மாறுதலைக் குறிக்கவும், இங்கு வழங்கப்படுகிறது. சமய இலக்கியத்தில் ஏற்பட்ட காலமாறுதல் என்பது சமயத்தைப் பற்றிய கருத்துக்கள் காலத்துக்கு ஏற்றவாறு எவ்வாறு மாறி வந்துள்ளன என்பதைச் சுட்டிக் காட்டப்பயன்படுகிறது.